ڕێکخراوی مەسەلە ڕاسپاردەکانی تایبەت بە سیاسەتی گۆڕانی کەشوهەوا پێشکەشی بەرپرسانی عێراق دەکات

بەغدا - عێراق

وەک بەشێک لە پابەندبوونی بە برەودان بە هاوکاری نێوان کۆمەڵگەی مەدەنی و بڕیار بەدەستان، ڕێکخراوی مەسەلە بۆ پەرەپێدانی سەرچاوە مرۆییەکان، کاغەزێکی ڕاسپاردەی تایبەت بە "پلانی وەڵامدانەوەی گۆڕانی کەشوهەوا لە عێراق" پێشکەشی دکتۆر نزار ئامێدی، وەزیری ژینگەی عێراق، و دکتۆر مەجید شەنگالی، سەرۆکی لیژنەی تەندروستی و ژینگە لە ئەنجومەنی نوێنەرانی عێراق کرد.

ئەم کاغەزە دوای ئەنجامدانی سێ دانیشتنی گفتوگۆ لە شارەکانی بەغدا، سلێمانی و موسڵ ئامادە کراوە، کە تێیدا ٣٥ ئەکادیمی، شارەزا و نوێنەری کۆمەڵگەی مەدەنی بەشداربوون. گفتوگۆکان جەختیان کردبووە سەر چوار کەرتی سەرەکی کە زۆرترین کاریگەریی گۆڕانی کەشوهەوایان لەسەرە، ئەوانیش: (وزە، گواستنەوە، ئاو، و کشتوکاڵ/دارستانەکان).

ڕاسپاردەکان هەنگاوی پراکتیکی بۆ پاڵپشتیکردنی هەوڵەکانی حکومەت لە ڕووبەڕووبوونەوەی تەحەددییە ژینگەیییەکان پێشنیار دەکەن، لەوانە:

• خێراکردنی پرۆسەی گۆڕان بەرەو وزەی نوێبووەوە.
• کۆتاییهێنان بە سووتاندنی غازی هاوەڵ.
• پەرەپێدانی سیستەمە بەردەوامەکانی گواستنەوە.
• پاراستنی سەرچاوەکانی ئاو.
• پاراستنی دارستانەکان و زۆنگاوەکان.

ئیبراهیم ئیسماعیل، بەڕێوەبەری جێبەجێکاری ڕێکخراوی مەسەلە، جەختی لەسەر گرنگیی هاوبەشی نێوان کۆمەڵگەی مەدەنی و حکومەت کردەوە بۆ داڕشتنی سیاسەتە ژینگەیییە کاریگەر و بەردەوامەکان. ئاماژەی بەوەش کرد کە ئامانجی ڕاسپاردەکان دابینکردنی چارەسەری گونجاوە بۆ کەمکردنەوەی کاریگەرییەکانی گۆڕانی کەشوهەوا و لە هەمان کاتدا برەودان بە گەشەپێدانی بەردەوام لە سەرتاسەری عێراقدا.